၁.၁

၁.၁.၁
ပင်ကိုယ်စရိုက်လက္ခဏာ 

အကြိုလေ့လာချက်

‘ပင်ကိုယ်စရိုက်လက္ခဏာ’ ကို အဓိပ္ပာယ် ဖွင့်ဆိုပါ။

ပင်ကိုယ်စရိုက်လက္ခဏာဆိုသည်မှာ လူသားတစ်ဦးအနေဖြင့် မိမိ၏ ရပ်တည်မှုအပေါ် ခံယူချက်၊ မတူညီသော လူအုပ်စုများ​နှင့် စပ်လျဉ်း၍ ခံယူချက်ဖြစ်ပါသည်။ လူသားများသည် မတူညီသော သွင်ပြင်လက္ခဏာများဖြင့် မွေးဖွားလာကြသည်။ ထိုမတူညီသော သွင်ပြင်လက္ခဏာများနှင့် ဆက်နွယ်၍ မိမိ၏ ပင်ကိုယ်စရိုက်လက္ခဏာကို ပုံဖော်ဖန်တီးတတ်ကြပါသည်။ ယဉ်ကျေးမှုနှင့် လူ့အဖွဲ့အစည်းသည်လည်း လူသားတို့၏ ပင်ကိုယ်စရိုက်လက္ခဏာများကို ပုံဖော်ဖန်တီးရာတွင် အရေးပါလှပါသည်။ လူသားတို့သည် အချို့သော ပင်ကိုယ်​စရိုက်လက္ခဏာများကို မိမိကိုယ်တိုင် ရွေးချယ်နိုင်ကြပြီး အခြား​သွင်ပြင်လက္ခဏာများကို မိဘ၊ ဘာသာရေးအကြီးအကဲများ သို့မဟုတ် အာဏာပိုင်များစသည့် အခြားသူများ၏ ရွေးချယ်​ပေးခြင်းကို ခံရတတ်ပါသည်။ လူသားတစ်ဦးသည် ကိုးကွယ်​ယုံကြည်မှုတစ်ခုမှ အခြားတစ်ခုသို့ ကူးပြောင်းရန် ရွေးချယ်နိုင်​ပါသည်။ တိုင်းရင်းသား ပင်ကိုယ်စရိုက်လက္ခဏာတစ်ရပ်ကို ဖော်ထုတ်နေသည့် ဘာသာစကားတစ်ခုခု ပြောဆိုတတ်ရန်၊ ပျော်ပွဲရွှင်ပွဲ နေ့ရက်အချို့၌ ပါဝင်ဆင်နွှဲနိုင်ရန်နှင့် ရိုးရာ​ဝတ်စုံများ ဝတ်ဆင်တတ်ရန် မိဘများက သားသမီးများကို ပြုစုပျိုးထောင်ပေးမှုမျိုး ရှိနိုင်သည်။

အဝတ်အစားကဲ့သို့သော ပင်ကိုယ်စရိုက်လက္ခဏာအချို့သည် မျက်စိဖြင့် မြင်တွေ့ရနိုင်သော လက္ခဏာများ ဖြစ်ပါသည်။ ကိုးကွယ်ယုံကြည်ရာ ဘာသာရေး၊ နိုင်ငံရေးခံယူချက်ကဲ့သို့သော ပင်ကိုယ်စရိုက်လက္ခဏာများမှာမူ မျက်စိဖြင့် မမြင်တွေ့နိုင်သော လက္ခဏာများဖြစ်ပါသည်။ လူတစ်ဦးတွင် ပင်ကိုယ်စရိုက်​လက္ခဏာအမျိုးမျိုး ရှိနေနိုင်သည်မှာ ထုံးစံဖြစ်ပါသည်။ ဘ၀​သက်တမ်းတစ်လျှောက်တွင် ထိုပင်ကိုယ်စရိုက်လက္ခဏာများမှာ မကြာခဏ ပြောင်းလဲတတ်ကြပါသည်။ လူအချို့တွင် သူတို့​အတွက် အရေးအပါဆုံးဟု ယူဆရသည့် ကိုယ်ပိုင်ပင်ကိုယ်​စရိုက် လက္ခဏာတစ်ခုစီ ရှိတတ်ကြပါသည်။ ထိုသီးသန့်​ပင်ကိုယ်စရိုက်လက္ခဏာမှာလည်း ဘ၀သက်တမ်း​တစ်လျှောက်တွင် ပြောင်းလဲသွားနိုင်ခြေရှိပါသည်။

ယေဘုယျအားဖြင့် လူတစ်ဦးချင်းနှင့် လူအုပ်စုတို့သည် ပင်ကိုယ်စရိုက်လက္ခဏာတစ်ခုတည်းကိုသာ ဘ၀၏ အရေးကြီး​အစိတ်အပိုင်းအဖြစ် မှတ်ယူလေ့ မရှိကြပါ။ ဥပမာဆိုရသော် ပင်ကိုယ်ဉာဉ်များ၊ စိတ်ဝင်စားမှု၊ ဦးစားပေးနှစ်သက်မှုများ​ကိုလည်း ၎င်းတို့အတွက် အရေးကြီးသည်ဟု မှတ်ယူတတ်ကြ​ပါသည်။

ပြန်လည်သုံးသပ်ချက်/ဆွေးနွေးချက်

၁။ မည်သည့်အရာတို့သည် သင်၏ အရေးအပါဆုံးသော ပင်ကိုယ်စရိုက်လက္ခဏာများ ဖြစ်သနည်း။

၂။ မည်သည့်အရာတို့သည် သင်နှင့် သိကျွမ်းသော၊ ဂရုစိုက်ရသောသူများအတွက် အရေးအပါဆုံးသော ပင်ကိုယ်စရိုက်လက္ခဏာများ ဖြစ်သနည်း။

၃။ ထိုပင်ကိုယ်စရိုက်လက္ခဏာများသည် အဘယ်ကြောင့် အရေးပါသနည်း။