အကြိုလေ့လာချက်
‘ကွဲပြားစုံလင်မှု’၊ ‘ဗဟုဝါဒ’ နှင့် ‘လူမှုတရားမျှတမှု’ ဆိုသည့် စကားလုံးများကို ရှင်းပြရန် စာကြောင်းတစ်ကြောင်းစီ ရေးသားပါ။
ကွဲပြားစုံလင်မှုဆိုသည်မှာ ခြားနားချက်များစွာနှင့် ကွဲပြားစုံလင်မှု ရှိကြောင်းကို ဆိုလိုပါသည်။ လူသားဆိုင်ရာ ကွဲပြားစုံလင်မှုဆိုသည်မှာ လူသားများတွင် မတူညီသော သွင်ပြင်လက္ခဏာများ ရှိခြင်းကို ဆိုလိုပါသည်။ ကွဲပြားစုံလင်မှုရှိခြင်းကြောင့် လူသားများ၊ ထိုသူတို့၏ အခြားသူများနှင့် ဆက်ဆံရေး၊ ထိုသူတို့၏ လူမှုအသိုက်အဝန်းနှင့် ထိုသူတို့နေထိုင်ရာ လူ့အဖွဲ့အစည်းတို့အတွက် အလွန်တန်ဖိုးရှိနိုင်ပါသည်။
ဗဟုဝါဒသည် ထင်မြင်ချက်များ၊ ပါဝင်နေသူများနှင့် အတွေးအခေါ်များ ကွဲပြားစုံလင်မှုသည် လူ့အဖွဲ့အစည်းအတွက် သင့်လျော်ကောင်းမွန်ပြီး၊ လူထုကို ပိုမို၍ ကိုယ်စားပြုသော နိုင်ငံရေးစနစ်တစ်ခုဆီသို့ ဦးတည်သွားနိုင်သည်ဟူသော အယူဝါဒဖြစ်ပါသည်။ ဗဟုဝါဒသည် လူနည်းစုဝင်များအပါအဝင် ပြည်သူအားလုံးကို ပိုမိုကောင်းမွန်စွာ ကိုယ်စားပြုခြင်းကို ဖြစ်စေနိုင်သော်လည်း ပို၍အဓိပ္ပာယ်ပြည့်၀သော ပူးပေါင်းပါဝင်မှုအဖြစ်သို့ သေချာပေါက် ကူးပြောင်းသွားမည် မဟုတ်ပါ။ လူနည်းစုများ ရင်ဆိုင်နေရသည့် စိန်ခေါ်မှုများကို ဖြေရှင်းနိုင်စွမ်းလည်း ရှိချင်မှ ရှိပါလိမ့်မည်။ အဘယ်ကြောင့်ဆိုသော် ဗဟုဝါဒကိုယ်တိုင်က လူများစုနှင့် လူနည်းစုတို့အကြား အာဏာမျှခြေပျက်ယွင်းမှုကို မဖြေရှင်းသည့်အတွက်ကြောင့် ဖြစ်ပါသည်။ လူများစုသည် ၎င်းတို့၏အာဏာကို အသုံးချ၍ လူနည်းစုကို ကူညီထောက်ပံ့မပေးသည့်အပြင် လူနည်းစု၏ အကျိုးစီးပွားကိုပင် ထိခိုက်စေနိုင်သော ဆုံးဖြတ်ချက်များ ချမှတ်ကောင်း ချမှတ်နိုင်ပါသေးသည်။
လူမှုတရားမျှတမှုသည် လူအုပ်စုအချင်းချင်းကြား အာဏာမျှခြေပျက်ယွင်းမှုကို ဖြေရှင်းပေးရန် ကြိုးပမ်းသည့်အတွက် လူမှုအသိုက်အဝန်းများနှင့် လူ့အဖွဲ့အစည်းတို့ကို ပိုမို၍ သာတူညီမျှဖြစ်လာစေသည်။ လူမှုတရားမျှတမှုသည် အောက်ပါတို့ကို လူသားတိုင်း ရရှိခံစားနိုင်ကြရန်အတွက် ခွဲခြားဆက်ဆံခံရခြင်း၊ ဆင်းရဲမွဲတေမှု အစရှိသည့် စနစ်နှင့် ဖွဲ့စည်းတည်ဆောက်ပုံဆိုင်ရာ အတားအဆီးများကို ဖယ်ရှားပေးသည်။
- ၎င်းတို့၏ အခွင့်အရေးများကို ရရှိစေရန်။
- တူညီသော အခွင့်အလမ်းများကို ရရှိခံစားရစေရန်။
- လူ့အဖွဲ့အစည်း၏ အရင်းအမြစ်များကို ရယူသုံးစွဲနိုင်ရန်။
- ၎င်းတို့အပေါ် သက်ရောက်မှုရှိစေသည့် ဆုံးဖြတ်ချက်ပြုလုပ်ရာတွင် တက်ကြွစွာ ပါဝင်နိုင်စေရန်။
- ၎င်းတို့၏ လူမှုအသိုက်အဝန်းများတွင် တက်ကြွစွာ ပါဝင်နိုင်စေရန်နှင့်
- လူသားတို့၏ အခြေခံလိုအပ်ချက်များ ပြည့်၀စေနိုင်ရန်။
လူအများအနေဖြင့် လူနည်းစုအခွင့်အရေးများကို ကာကွယ်ပေးခြင်း၊ အားပေးကူညီခြင်းနှင့် ခိုင်မာစေခြင်းဖြင့် လူမှုတရားမျှတမှုကို မည်သို့ ပံ့ပိုးကူညီနိုင်သည်ဟူသော အယူအဆများကို ဤစာအုပ်တွင် တင်ပြပေးသွားပါမည်။
ပြန်လည်သုံးသပ်ချက်/ဆွေးနွေးချက်
ဗဟုဝါဒသည် လူများစုနှင့် လူနည်းစုအကြား အာဏာမျှခြေပျက်ယွင်းမှုကို ရင်ဆိုင်ဖြေရှင်းပေးနိုင်ခြင်း မရှိသည့်တိုင် လူမှုတရားမျှတမှုကို ဖြစ်မြောက်နိုင်ရန် ကောင်းမွန်သော ပထမခြေလှမ်းတစ်ခု ဖြစ်ပါသည်။
၁။ ဤဖော်ပြချက်ကို သင် သဘောတူညီပါသလား၊ ကန့်ကွက်ပါသလား။ အဘယ်ကြောင့်နည်း။
၂။ လူမှုတရားမျှတမှုကို ပံ့ပိုးပေးနိုင်မည့် ကိစ္စတစ်စုံတစ်ခုကို သင်စွမ်းဆောင်ခဲ့ဖူးပါသလား။ အထက်တွင် bullet point ဖြင့် ဖော်ပြထားခဲ့သော အချက်များကို အသုံးပြု၍ တွေးခေါ်ပါ။
အမျိုးသားရေးဝါဒီ
လှုပ်ရှားသွားလာနိုင်မှု
အမွေအနှစ်
ကိုလိုနီဝါဒ